ដោយ យន់ សាមៀន
2010-12-04
ពីរឆ្នាំបន្ទាប់ពីប្រទេសកម្ពុជា និងថៃ បានជួបប្រទះវិបត្តិព្រំដែនតំបន់ក្បែរប្រាសាទព្រះវិហារមក ស្ថានភាពព្រំដែនកម្ពុជា និងថៃ កំពុងតែវិលទៅរកភាពធម្មតាវិញដូចកាលពីមុនថ្ងៃទី១៥ ខែកក្កដា ឆ្នាំ២០០៨ ជាថ្ងៃដែលកងទ័ពថៃ បានលើកទ័ពមកឈរជើងនៅតំបន់ក្បែរប្រាសាទវិហារ ដែលគ្រានោះ រដ្ឋាភិបាលកម្ពុជា បានហៅសកម្មភាពរបស់កងទ័ពថៃថា ជាការឈ្លានពានបូរណភាពទឹកដីកម្ពុជា។
ក្រោយពីមានការប៉ះទង្គិចគ្នារវាងកងទ័ពថៃ និងកម្ពុជា ជាច្រើនលើក ដែលបណ្ដាលឲ្យកងទ័ពរបស់ប្រទេសទាំងពីរបានស្លាប់ និងរបួសជាច្រើននាក់រួចមក កងទ័ពថៃ ដែលបានឈរជើងនៅតំបន់ជម្លោះក្បែរប្រាសាទព្រះវិហារ តាំងពីថ្ងៃចាប់ផ្ដើមការឈ្លានពានមក បានដកចេញពីវត្តកែវសិក្ខាគិរីស្វារៈ ហើយ កាលពីថ្ងៃទី១ ខែធ្នូ វេលាម៉ោង ១០ព្រឹក។
មន្ត្រីសមត្ថកិច្ចប្រចាំនៅប្រាសាទព្រះវិហារ និងមន្ត្រីជាន់ខ្ពស់រដ្ឋាភិបាល នៅថ្ងៃសុក្រ ទី៣ ខែធ្នូ បានប្រាប់វិទ្យុអាស៊ីសេរី ឲ្យដឹងថា កងទ័ពថៃ ចំនួន ១០នាក់ ដែលបានឈរជើងនៅក្នុងវត្តកែវសិក្ខាគិរីស្វារៈ និងកងទ័ពថៃ មួយចំនួនទៀតនៅតាមតំបន់ជម្លោះក្បែរប្រាសាទព្រះវិហារ បានដកចេញពីតំបន់ជម្លោះហើយ។ កងទ័ពថៃទាំងនោះត្រូវបានដាក់ឲ្យឈរជើងនៅក្បែរច្រកព្រំដែនក្បែរប្រាសាទព្រះវិហារវិញ។
ទោះបីជាយ៉ាងណាក៏ដោយ នាយករដ្ឋមន្ត្រីថៃ បានបដិសេធព័ត៌មានដែលថា កងទ័ពរបស់ខ្លួនបានដកចេញពីតំបន់ជម្លោះប្រាសាទព្រះវិហារ។ នាយករដ្ឋមន្ត្រីថៃ បានបញ្ជាក់ថា កងទ័ពថៃ នឹងបន្តវត្តមានរបស់ខ្លួននៅតំបន់ជម្លោះព្រំដែនកម្ពុជា-ថៃ រហូតទាល់តែវិបត្តិព្រំដែនត្រូវបានដោះស្រាយ។
មន្ត្រីកងរាជអាវុធហត្ថម្នាក់ដែលសុំមិនបញ្ចេញឈ្មោះ បានឲ្យដឹងថា កងទ័ពថៃ ចំនួន ១០នាក់ដែលបានចូលមកស្នាក់នៅក្នុងវត្តខ្មែរឈ្មោះថា វត្តកែវសិក្ខាគិរីស្វារៈ តាំងពីថ្ងៃទី១៥ ខែកក្កដា ឆ្នាំ២០០៨ បានចាកចេញទៅប្រទេសថៃវិញហើយ នៅម៉ោង ១០ព្រឹក។ មន្ត្រីជាន់ខ្ពស់រដ្ឋាភិបាលម្នាក់ទៀត ដែលបានសុំមិនបញ្ចេញឈ្មោះ បានបញ្ជាក់ថា កងទ័ពថៃ ពិតជាបានដកចេញពីតំបន់ជម្លោះមែន។
ប្រទេសកម្ពុជា បានគ្រោងបើកច្រកព្រំដែនកម្ពុជា និងថៃ នៅក្បែរប្រាសាទព្រះវិហារនៅក្នុងខែធ្នូ ប៉ុន្តែគម្រោងនេះ ត្រូវបានលុបចោលវិញ បន្ទាប់ពីមន្ត្រីកម្ពុជា និងថៃ មិនទាន់ចរចាគ្នាត្រូវ ទាក់ទងនឹងការបែងចែកផលប្រយោជន៍ពីការបើកច្រកប្រាសាទព្រះវិហារ។
លោក ផៃ ស៊ីផាន អ្នកនាំពាក្យគណៈរដ្ឋមន្រ្តី មានប្រសាសន៍ប្រាប់វិទ្យុអាស៊ីសេរី នៅថ្ងៃសុក្រ ទី៣ ខែធ្នូ ឲ្យដឹងថា លោកមិនទាន់ទទួលព័ត៌មាននៃការដកកងទ័ពថៃ ចេញពីតំបន់ជម្លោះនៅឡើយទេ ប៉ុន្តែបើព័ត៌មាននៃការកែសម្រួលកងទ័ពថៃជាការពិត វាជាការប្រសើរសម្រាប់ទំនាក់ទំនងកម្ពុជា និងថៃ។
កាសែតបាងកក ប៉ុស្តិ៍ ផ្សាយនៅថ្ងៃទី២ ខែធ្នូ បានដកស្រង់សម្ដីរបស់លោក អាភីស៊ិត វេតឆាឈីវ៉ាក់ (Abhisit Vejjajiva) នាយករដ្ឋមន្ត្រីថៃ ដែលមានប្រសាសន៍ឲ្យដឹងថា កងទ័ពថៃ នឹងរក្សាវត្តមានរបស់ខ្លួនក្នុងតំបន់ជម្លោះ ៤,៦គីឡូម៉ែត្រការ៉េ ក្បែរប្រាសាទព្រះវិហារ រហូតដល់ជម្លោះព្រំដែនត្រូវបានដោះស្រាយ។
ភាពតានតឹងរវាងកម្ពុជា និងថៃ ទាក់ទងនឹងបញ្ហាជម្លោះព្រំដែន ហាក់បីដូចជាមិនទាន់ចប់នៅឡើយទេ នៅពេលដែលមន្ត្រីកម្ពុជា បានប្រកាសលុបចោលគម្រោងរបស់ខ្លួន ដើម្បីបើកច្រកព្រំដែនប្រាសាទព្រះវិហារ ដើម្បីឲ្យអ្នកទេសចរអាចមកទស្សនាប្រាសាទព្រះវិហារតាមច្រកទឹកដីថៃ។ គម្រោងបើកច្រកព្រំដែននេះ ត្រូវបានលុបចោលដោយគ្មានពេលកំណត់នោះទេ។
មន្ត្រីរដ្ឋាភិបាលកម្ពុជា បានឲ្យដឹងថា ការលុបចោលគម្រោងបើកច្រកព្រំដែន ដោយសារតែភាគីថៃ ចង់ឲ្យអ្នកលក់ដូរជនជាតិថៃ អាចមកលក់ដូរអីវ៉ាន់របស់ខ្លួននៅលើទឹកដីខ្មែរ ហើយភាគីទាំងពីរនៅមិនទាន់អាចកំណត់រកទីតាំងលក់សំបុត្រចូលទៅទស្សនាប្រាសាទព្រះវិហារបាន។
អាជ្ញាធរកម្ពុជា បានបិទច្រកព្រំដែនប្រាសាទព្រះវិហារ មិនឲ្យអ្នកទេសចរចូលទស្សនាប្រាសាទព្រះវិហារពីប្រទេសថៃ កាលពីខែមិថុនា ឆ្នាំ២០០៨ ក្រោយពីមានបាតុករថៃចំនួន ១៥០នាក់ បានតវ៉ាប្រឆាំងការគាំទ្ររដ្ឋាភិបាលថៃ ដោយបានអនុញ្ញាតឲ្យប្រទេសកម្ពុជា ដាក់ប្រាសាទព្រះវិហារចូលក្នុងបញ្ជីសម្បត្តិបេតិកភណ្ឌពិភពលោក។
ក្រោយពីប្រាសាទព្រះវិហារត្រូវបានគណៈកម្មាធិការបេតិកភណ្ឌពិភពលោក សម្រេចចុះក្នុងបញ្ជីសម្បត្តិបេតិកភណ្ឌពិភពលោក កាលពីថ្ងៃទី៧ ខែកក្កដា ឆ្នាំ២០០៨មក កងទ័ពថៃ បានលើកទ័ពចូលទឹកដីកម្ពុជា ក្នុងវត្តកែវសិក្ខាគិរីស្វារៈ ក្បែរប្រាសាទព្រះវិហារ កាលពីថ្ងៃទី១៥ ខែកក្កដា។ រដ្ឋាភិបាលកម្ពុជា បានហៅថា ជាការឈ្លានពានបូរណភាពដឹកដីកម្ពុជា។
ទោះបីជាស្ថានភាពកងទ័ពនៅតំបន់ជម្លោះបានវិលទៅរកភាពធូរស្រាល ប៉ុន្តែរដ្ឋាភិបាលថៃ នៅតែបន្តជំទាស់គម្រោងផែនការរៀបចំប្រាសាទព្រះវិហារខ្មែរដដែល។
លោក អាភីស៊ិត វេតឆាឈីវ៉ាក់ កាលពីថ្ងៃអាទិត្យ ទី២១ ខែវិច្ឆិកា បានប្រកាសជាសាធារណៈតាមរយៈប្រព័ន្ធផ្សព្វផ្សាយថៃ ឲ្យដឹងថា រដ្ឋាភិបាលថៃ នឹងជំទាស់ផែនការរៀបចំប្រាសាទព្រះវិហាររបស់ខ្មែរ ដែលកម្ពុជា គ្រោងនឹងដាក់ទៅឲ្យគណៈកម្មាធិការបេតិកភណ្ឌពិភពលោក ដើម្បីពិនិត្យសម្រេចនៅខែមិថុនា ឆ្នាំ២០១១។
លោក អាភីស៊ិត វេតឆាឈីវ៉ាក់ បានឲ្យដឹងទៀតថា រដ្ឋាភិបាលថៃ នឹងគោរពសេចក្តីសម្រេចចិត្តរបស់តុលាការអន្តរជាតិទីក្រុងឡាអេ ឆ្នាំ១៩៦២ ប៉ុន្តែថៃ នឹងជំទាស់ផែនការរៀបចំប្រាសាទព្រះវិហាររបស់កម្ពុជា ពីព្រោះផែនការរៀបចំប្រាសាទព្រះវិហារនេះ នឹងអាចជំរុញឲ្យប្រទេសទាំងពីរនេះ មានជម្លោះព្រំដែន។ លោក អាភីស៊ិត វេតឆាឈីវ៉ាក់ បន្តទៀតថា ប្រទេសថៃ នឹងយកខ្សែបែងចែកទឹក ដើម្បីកំណត់ព្រំដែនរវាងកម្ពុជា និងថៃ។
លោក យឹម សុវណ្ណ អ្នកនាំពាក្យគណបក្ស សម រង្ស៊ី នៅថ្ងៃសុក្រ ក៏បានស្វាគមន៍ការដកកងទ័ពថៃ ចេញពីទឹកដីកម្ពុជា។ ប៉ុន្តែលោកបានស្នើឲ្យរដ្ឋាភិបាលកម្ពុជា បន្តស្វែងរកដំណោះស្រាយបញ្ហាព្រំដែនកម្ពុជា-ថៃ ជាលក្ខណៈអន្តរជាតិ។
ប្រទេសកម្ពុជា កាលពីពេលថ្មីនេះៗ បានប្រកាសថា ប្រសិនបើសភាថៃ មិនអនុម័តលទ្ធផលនៃការចរចារបស់គណៈកម្មាធិការព្រំដែនទូទៅរវាងកម្ពុជា និងថៃនោះទេ ប្រទេសកម្ពុជា នឹងមិនបន្តចរចាបញ្ហាព្រំដែនជាមួយថៃ ជាលក្ខណៈទ្វេភាគីបាននោះទេ៕
No comments:
Post a Comment