ដោយ តាំង សារ៉ាដា
2010-12-03
រដ្ឋមន្ត្រីក្រសួងការបរទេសសហរដ្ឋអាមេរិក លោកស្រី ហ៊ីលឡារី គ្លិនតុន (Hillary Clinton) កាលពីថ្ងៃពុធ បានថ្លែងថា រដ្ឋាភិបាលអាមេរិក សូមធ្វើការថ្កោលទោសយ៉ាងខ្លាំង ចំពោះបទឧក្រិដ្ឋកម្មក្នុងការបញ្ចេញឯកសារសម្ងាត់ ដែលអាចធ្វើឲ្យគ្រោះថ្នាក់ដល់អាយុជីវិតមនុស្ស គំរាមដល់សន្តិសុខរបស់សហរដ្ឋអាមេរិក និងធ្វើឲ្យខូចខាតដល់កិច្ចប្រឹងប្រែងរបស់អាមេរិក ដែលសហការជាមួយបណ្ដាប្រទេសដទៃក្នុងការចែករំលែកព័ត៌មានគ្នាទៅវិញទៅមក។
លោកស្រីមានប្រសាសន៍បន្តថា ការលួចបញ្ចេញឯកសារសម្ងាត់នេះ មិនគ្រាន់តែជាការវាយប្រហារទៅលើផលប្រយោជន៍ គោលនយោបាយបរទេសរបស់សហរដ្ឋអាមេរិកប៉ុណ្ណោះទេ តែវាជាការវាយប្រហារផងដែរទៅលើសហគមន៍អន្តរជាតិ សម្ព័ន្ធមិត្តភាពជាដៃគូការសន្ទនា ការចរចាអំពីការពារសុវត្ថិភាពសកល និងការធ្វើឲ្យវិវឌ្ឍជឿនលឿនផ្នែកសេដ្ឋកិច្ចផងដែរ។
លោកស្រី ហ៊ីលឡារី គ្លិនតុន ថ្លែងបន្ថែមថា ៖ "សហរដ្ឋអាមេរិកមានការសោកស្ដាយយ៉ាងខ្លាំង ចំពោះការទម្លាយព័ត៌មានទាំងឡាយណា ដែលយើងមានបំណងរក្សាភាពសម្ងាត់ ក្នុងនោះរួមមានទាំងការពិភាក្សាជាឯកជនរវាងសមភាគីរបស់អាមេរិកទាំងឡាយ និងរបាយការណ៍របស់ក្រុមមន្ត្រីការទូតរបស់យើងក្នុងការអង្កេត និងពិនិត្យ។ ខ្ញុំចង់ជម្រាបឲ្យបានច្បាស់ថា គោលនយោបាយការបរទេសជាផ្លូវការរបស់យើង មិនមែនស្ថិតនៅលើអ្វីដែលបានទម្លាយចេញនោះទេ គោលនយោបាយរបស់យើង គឺផ្អែកលើឯកសារសាធារណៈ និងសកម្មភាពរបស់យើងនៅជុំវិញពិភពលោក"។
ទីភ្នាក់ងារព័ត៌មាន Associated Press បានឲ្យដឹងថា ព័ត៌មានសំខាន់ៗមានចំនួន ២សែន៥ម៉ឺនទំព័រ ស្ដីពីបណ្ដាប្រទេសជាច្រើននៅជុំវិញពិភពលោក ត្រូវបានទម្លាយកាលពីពេលថ្មីៗនេះ ហើយបានចេញផ្សាយក្នុងគេហទំព័រ Wikileaks មានដូចជាឯកសារទាក់ទិនទៅនឹងប្រទេសកូរ៉េខាងជើង ក្នុងការលក់កាំជ្រួចដែលបាញ់បានឆ្ងាយឲ្យទៅប្រទេសអ៊ីរ៉ង់ ឬទៅឲ្យបណ្ដាប្រទេសមួយចំនួននៅមជ្ឈិមបូព៌ាជាដើម។
កាសែតក្នុងស្រុកនៃប្រទេសកម្ពុជា ឈ្មោះ ឌឹ ឃេមបូឌា ដេលី (The Cambodia Daily) បានចេញផ្សាយនៅថ្ងៃអង្គារ ទី៣០ ខែវិច្ឆិកា ឲ្យដឹងថា គេហទំព័រ Wikileaks នឹងផ្សាយឯកសាររបស់ស្ថានទូតអាមេរិកនៅកម្ពុជា មានចំនួន ៧៧៧ទំព័រ ដែលបានចាប់ផ្តើមកត់ត្រាតាំងពីទសវត្សរ៍១៩៩០មក ក្នុងពេលខាងមុខឆាប់ៗនេះ។
ឯកសារទាំងនោះបានបង្ហាញពីការព្រួយបារម្ភពីបញ្ហាបោះឆ្នោតឆ្នាំ២០០៨ ការធ្វើឃាតអ្នកសារព័ត៌មានគណបក្សប្រឆាំងលោក ឃឹម សំបូរ និងការកាត់ទោសខ្មែរក្រហមជាដើម។
លោកស្រី ហ៊ីលឡារី គ្លិនតុន បានបន្តថា រដ្ឋបាលរបស់លោកប្រធានាធិបតី បារ៉ាក់ អូបាម៉ា (Barack Obama) នឹងធ្វើការតាមដានយ៉ាងយកចិត្តទុកដាក់បំផុត ក្នុងការស្វែងរកជនដៃដល់ដែលបានទម្លាយឯកសារទាំងនេះ ៖ "ខ្ញុំចង់ឲ្យអស់លោកអ្នកដឹងថា យើងកំពុងចាត់វិធានការជាបន្ទាន់ ហើយមិនញញើត ដើម្បីឲ្យអ្នកដែលលួចព័ត៌មានទាំងនោះទទួលខុសត្រូវ។ ខ្ញុំបានបញ្ជាឲ្យក្រសួងការបរទេសចាត់វិធានការជាក់លាក់មួយបន្ថែមទៅនឹងការចាត់វិធានការការពារសន្តិសុខផ្នែកព័ត៌មាននៅក្រសួងការពារជាតិ ហើយនិងនៅទីដទៃទៀត"។
សហរដ្ឋអាមេរិកក៏បានអំពាវនាវដល់បណ្ដាប្រទេសទាំងឡាយ មានទំនាក់ទំនងការទូតជាមួយអាមេរិក ឲ្យចូលរួមក្នុងការស៊ើបអង្កេត និងសហការបន្ថែមទៀតលើបញ្ហាធ្លាយព័ត៌មានសម្ងាត់ទាំងនោះ។
ទោះបីជាយ៉ាងណាក៏ដោយ គេនៅមិនទាន់ឃើញយន្តការ ឬផែនការច្បាស់លាស់ណាមួយពីខាងរដ្ឋាភិបាលកម្ពុជា នៅឡើយទេ ដើម្បីឆ្លើយតបទៅនឹងការអំពាវនាវរបស់សហរដ្ឋអាមេរិកនោះ។
អ្នកនាំពាក្យនៃទីស្ដីការគណៈរដ្ឋមន្ត្រីរបស់ប្រទេសកម្ពុជា លោក ផៃ ស៊ីផាន មានប្រសាសន៍ថា កម្ពុជានឹងមិនលូកដៃចូលក្នុងបញ្ហាផ្ទៃក្នុងរបស់សហរដ្ឋអាមេរិកឡើយ។ ប៉ុន្តែប្រធានមជ្ឈមណ្ឌលសិទ្ធិមនុស្សកម្ពុជា លោក អ៊ូ វីរៈ ហាក់មានប្រសាសន៍ផ្ទុយទៅវិញថា រដ្ឋាភិបាលសហរដ្ឋអាមេរិក និងរដ្ឋាភិបាលកម្ពុជា គួរតែបើកចំហព័ត៌មានទាំងឡាយណា ដែលនិយាយអំពីផលប្រយោជន៍សាធារណៈ ឬទំនាក់ទំនងការទូតផេ្សងៗ។
កាសែត The Wall Street Journal របស់អាមេរិក បានដកស្រង់សម្ដីរបស់ រដ្ឋមន្ត្រីក្រសួងយុត្តិធម៌អាមេរិក លោក អ៊ីរ៉ិច ហូល (Eric Hold) ថា ក្រសួងយុត្តិធម៌នឹងតាមដាន ហើយបើកការស៊ើបអង្កេតជាបន្ទាន់ ដើម្បីវែកមុខជនប្រព្រឹត្តបទល្មើសទាំងឡាយណាដែលទម្លាយឯកសារការទូតទាំងនេះ៕
No comments:
Post a Comment