ដោយ វោហារ ជាតិ
2010-11-30
លោកនាយករដ្ឋមន្ត្រី ហ៊ុន សែន បានទទួលស្គាល់ថា សោកនាដកម្មមនុស្សរត់ជាន់គ្នាស្លាប់យ៉ាងអាណោចអាធ័មនៅលើស្ពានកោះពេជ្រ នៅថ្ងៃបុណ្យអុំទូកកន្លងមកនេះ គឺជាកំហុសរួម ពោលគឺកំហុសទាំងអ្នកចូលរួម និងកំហុសរបស់រដ្ឋាភិបាលផងដែរ។
ថ្លែងនៅក្នុងពិធីសម្ពោធដាក់ឲ្យប្រើប្រាស់អគារមួយក្នុងក្រសួងសង្គមកិច្ច យុទ្ធជន និងយុវនីតិសម្បទា នៅថ្ងៃទី២៩ ខែវិច្ឆិកា លោកនាយករដ្ឋមន្ត្រីមានប្រសាសន៍ថា ៖ «ក្នុងក្របខ័ណ្ឌនយោបាយ ខ្ញុំត្រូវតែហ៊ាននិយាយអំពីចំណុចខ្វះខាតទៅលើវិស័យនយោបាយ ដែលទាក់ទងក្របខ័ណ្ឌរួម ជាក្របខ័ណ្ឌម៉ាក្រូតែម្ដង។ កំហុសធំបំផុតរបស់យើង នោះគឺការវាយតម្លៃសភាពការណ៍មិនបានគ្រប់ជ្រុងជ្រោយ មើលស្រាលសភាពការណ៍ នឹកស្មានមិនដល់ ព្រមទាំងមានការធ្វេសប្រហែស នេះជាចំណុចរួមដែលនាំទៅដល់សភាពការណ៍បែបនេះ។ យើងមើលស្រាលសភាពការណ៍ថា វានឹងមិនកើតឡើងរឿងនេះទេ»។
សេចក្តីថ្លែងការណ៍របស់លោកនាយករដ្ឋមន្ត្រីនេះ ត្រូវបានមន្ត្រីបក្សប្រឆាំងអះអាងថា ជាការដោះសាយករួចខ្លួន ហើយបានបញ្ជាក់ថា មន្ត្រីបក្សប្រឆាំងនៅតែបន្តទាមទារឲ្យមានការទទួលខុសត្រូវដូចមុនដដែល។
លោក យឹម សុវណ្ណ មន្ត្រីបក្ស សម រង្ស៊ី បញ្ជាក់ ៖ «មិនអាចបញ្ចប់ទៅដោយគ្មានន័យបានទេ។ យើងត្រូវតែបន្តការតស៊ូមតិ ដើម្បីឲ្យមានអ្នកទទួលខុសត្រូវ សុំឲ្យបង្កើតគណៈកម្មាធិការឯករាជ្យ ដើម្បីស្វែងរកមូលហេតុពិតប្រាកដ ហើយគឺមន្ត្រីទទួលខុសត្រូវ ត្រូវតែលាចេញពីតំណែង។ យើងនឹងអញ្ជើញរដ្ឋាភិបាលមកឆ្លើយបំភ្លឺនៅរដ្ឋសភា»។
មនុស្សចំនួន ៣៥១នាក់ និងរបួស ៣៩៥នាក់ ក្នុងឧបទ្ទវហេតុមនុស្សផ្អើលជាន់គ្នានៅលើស្ពានកោះពេជ្រ កាលពីថ្ងៃទី២២ ខែវិច្ឆិកា ដែលគេមិននឹកស្មានដល់។ ចំនួននេះខុសពីចំនួនដែលរដ្ឋាភិបាលបានប្រកាសលើកមុន ដែលមានអ្នករបួស និងអ្នកស្លាប់ជិត ១.០០០នាក់។ ប្រឆាំងទាមទារឲ្យរកអ្នកទទួលខុសត្រូវចំពោះសេចក្ដីស្លាប់យ៉ាងរន្ធត់នោះ។
ខណៈដែលគណៈកម្មាធិការស៊ើបអង្កេតកំពុងបន្ត លោកនាយករដ្ឋមន្ត្រី ហ៊ុន សែន បានប្រកាសជាសាធារណៈថា មិនមានការដកតំណែងមន្ត្រីណាម្នាក់ក្នុងរឿងនេះទេ ៖ «គេថា យើងអសមត្ថភាព គឺជារឿងត្រឹមត្រូវ ប៉ុន្តែសុំសួរទៀតថា ចុះបើអសមត្ថភាពហើយម៉េចមិនលាលែង? ខ្ញុំសួរបញ្ជាក់ទៅវិញថា តើប្រធានាធិបតី ប៊ូស បានលាលែងពីតំណែងទេ? ព្រោះអ្នកដែលបានលើកឡើងហ្នឹងច្រើនតែប៉្រូអាមេរិកាំង។ ព្រឹត្តិការណ៍នៅអាមេរិកអាចទប់ស្កាត់បាន ព្រោះគេបានព្រមានរួចហើយថា នឹងមានភេរវកម្ម។ នៅពេលដែលយន្តហោះបុកអគារពាណិជ្ជកម្មពិភពលោក តើចៅហ្វាយក្រុងញូវយ៉ក (New York) លាលែងទេ? តើប្រធានាធិបតី ប៊ូស (George W. Bush) លាលែង? តើដូណាលដ៍ រ៉ាំស្វែលដ៍ (Donald Rumsfeld) រដ្ឋមន្ត្រីការពារជាតិរបស់អាមេរិកលាលែងទេ?»។
លោកនាយករដ្ឋមន្ត្រីបានឲ្យដឹងដែរថា អ្នកដែលបានស្លាប់នៅក្នុងព្រឹត្តិការណ៍ជាន់គ្នាស្លាប់នៅកោះពេជ្រនោះ គ្រួសារសពនីមួយៗ នឹងត្រូវទទួលបានប្រាក់ឧបត្ថម្ភចំនួន ១២.០០០ដុល្លារ៕
No comments:
Post a Comment