សកម្មជនដ៏សកម្មម្នាក់ក្នុងសហគមន៍ខ្មែរនៅទីក្រុងឡូវែល (Lowell) រដ្ឋម៉ាស្សាឈូសេត (Massachusetts) លោក នួន វាសនា មានប្រសាសន៍ថា ក្រុមរបស់លោកនឹងរៀបចំធ្វើពិធីរៃអង្គាសថវិកាជួយដល់ជនរងគ្រោះលើស្ពានកោះពេជ្រ ដែលកំពុងសម្រាកព្យាបាលនៅតាមមន្ទីរពេទ្យ ឬនៅតាមគេហដ្ឋាន។
លោកមានប្រសាសន៍ថា ដោយសារក្រុមរបស់លោក រួមនឹងពលរដ្ឋក្នុងសហគមន៍ខ្មែរ នៅមិនទាន់មានពេលសម្រាកពីការងារ ដូច្នេះហើយបានជាការរៀបចំធ្វើពិធីទាំងអស់នេះ ហាក់នៅមានភាពយឺតយ៉ាវបន្តិច។ លោកបន្តថា ទោះបីជាយ៉ាងណាក៏ដោយ ក៏ក្រុមប្រជាពលរដ្ឋក្នុងទីក្រុងឡូវែល ក៏ដូចព្រះសង្ឃខ្មែរជាច្រើន នឹងចាប់ផ្តើមធ្វើពិធីនេះនៅវេលាថ្ងៃសៅរ៍ ខាងមុខ នៅវត្តចាស់ និងវត្តថ្មី។
លោក នួន វាសនា មានប្រសាសន៍ថា សាលាក្រុងឡូវែល បានសម្រូតទង់ជាតិរបស់ខ្មែរពាក់កណ្តាលដង ដើម្បីចូលរួមការកាន់ទុក្ខដល់ព្រលឹងអ្នកដែលបានបាត់បង់ជីវិតរាប់រយអ្នកនោះ។ លោកថ្លែងថា តំណាងរាស្រ្តរបស់រដ្ឋម៉ាស្សាឈូសេត លោកស្រី នីគី ស្តូតហ្គាស (Niki Tsongas) ក៏បានចេញសេចក្តីថ្លែងការណ៍ចូលរួមរំលែកទុក្ខដល់ពលរដ្ឋខ្មែរទាំងនោះផងដែរ។
ចំណែកពីរដ្ឋម៉ារីឡែន (Maryland) ឯណោះវិញ លោក ទួន សុវាន់ ដែលជាប្រធានគណៈកម្មការវត្តពុទ្ធិការាម ឬវត្តខ្មែរម៉ារីឡែន បានមានប្រសាសន៍ថា លោកគ្រោងរៀបចំធ្វើពិធីបង្សុកូលនៅថ្ងៃអាទិត្យ ខាងមុខនេះ ដើម្បីបញ្ជូនកុសលដល់អ្នកដែលបានចែកឋាន ហើយលោកក៏នឹងធ្វើការប្រកាសរៃអង្គាសបច្ច័យទាំងនោះជួយដល់ជនរងគ្រោះផងដែរ។ លោកមានប្រសាសន៍ថា វត្តពុទ្ធិការាមមានថវិកាចំនួន ១ពាន់ដុល្លារសហរដ្ឋអាមេរិក ដែលគ្រោងជួយជនរងគ្រោះតាមរយៈស្ថានីយទូរទស្សន៍ CTN។
អត្រាមរណៈពីឧបទ្ទវហេតុជាន់គ្នាលើស្ពានកោះពេជ្រ កាលពីយប់ថ្ងៃច័ន្ទ ទី២២ ក្នុងទីក្រុងភ្នំពេញកន្លងទៅនេះ ជាអត្រាមួយដែលមានចំនួនច្រើនជាងគេបង្អស់ បើប្រៀបធៀបទៅនឹងបណ្តាប្រទេសមួយចំនួនក្នុងពិភពលោក ដែលធ្លាប់មានឧបទ្ទវហេតុស្រដៀងគ្នានេះ។
លោក គុជ ចាន់លី ជាពលរដ្ឋខ្មែរក្នុងរដ្ឋម៉ារីឡែ ដែលជាអ្នកតាមស្ថានការណ៍ក្នុងប្រទេសកម្ពុជា យ៉ាងស្អិតដែរនោះ មានប្រសាសន៍ថា នៅពេលបុណ្យ Thanksgiving របស់អាមេរិកបញ្ចប់ទៅ លោកនឹងចាប់ផ្តើមរកជំនួយបន្ថែមសម្រាប់ជនរងគ្រោះខ្មែរទាំងនោះ។
បើទោះបីពលរដ្ឋខ្មែរទាំងឡាយកំពុងរស់ឆ្ងាយចាកពីស្រុកកំណើតរបស់ខ្លួនយ៉ាងណាក៏ដោយ ក៏ខ្មែរមិនដែលបំភ្លេចអំពីសុខទុក្ខរបស់ពលរដ្ឋខ្មែរនៅក្នុងប្រទេសឡើយ។ រាល់វិបត្តិនានាដែលបានកើតមានឡើងចំពោះពលរដ្ឋខ្មែរក្នុងប្រទេសកន្លងមក អ្នកដែលរស់នៅឯនាយសមុទ្រតែងយកចិត្តទុក្ខដាក់ខ្ពស់បំផុត។
កាលពីថ្ងៃពុធ កន្លងទៅនេះ សមាគម និងអង្គការរបស់ខ្មែរក្នុងសហរដ្ឋអាមេរិកជាច្រើន ក៏បានចូលរួមជាមួយស្ថានទូតខ្មែរប្រចាំក្នុងរដ្ឋធានីវ៉ាស៊ីនតុន (Washington) ដើម្បីរំឭកដល់វិញ្ញាណក្ខន្ធអ្នកដែលបាត់បង់ជីវិតពីឧបទ្ទវហេតុរត់ជាន់គ្នាលើស្ពានកោះពេជ្រ ព្រមទាំងចូលរួមបរិច្ចាគជួយដល់ជនរងគ្រោះដែលនៅរស់រានមានជីវិតផងដែរ៕
Riviera for Skype is a Skype Call Recorder. It automatically records Skype calls and conversations to MP3 files. It is convenient for recording interviews, tech talks, conferences, audio casts, pod casts for learning later, etc.
ReplyDelete