ដោយ សុខ សេរី
2010-11-25
តំណាងទូតបរទេសចំនួន ៣០ប្រទេសនៅក្នុងប្រទេសកម្ពុជា បានមកចូលរួមនៅក្នុងពិធីនេះ នៅក្នុងនោះមានតំណាងទូតនៃសហរដ្ឋអាមេរិក ប្រទេសរុស្ស៊ី ប្រទេសថៃ ប្រទេសចិន ប្រទេសវៀតណាម ប្រទេសអង់គ្លេស និងប្រទេសសិង្ហបុរីជាដើម។
តំណាងអង្គការអន្តរជាតិចំនួន៨ ដែលមកចូលរួមផងដែរនោះ មានដូចជាអង្គការ UNDP អង្គការ UNESCO អង្គការ UNICEF អង្គការ UNHCR និងការិយាល័យឧត្តមស្នងការអង្គការសហប្រជាជាតិ ទទួលបន្ទុកសិទ្ធិមនុស្សនៅក្នុងប្រទេសកម្ពុជាជាដើម។
រដ្ឋមន្ត្រីក្រសួងការបរទេសកម្ពុជា លោក ហោ ណាំហុង ជាឧបនាយករដ្ឋមន្ត្រី តំណាងឲ្យលោកនាយករដ្ឋមន្ត្រី ហ៊ុន សែន និងតាងនាមរដ្ឋាភិបាលកម្ពុជា ដែលបានដឹកនាំពិធីបង្សុកូលនេះ បានមានប្រសាសន៍ថា មានមេដឹកនាំប្រទេសជាច្រើននៅលើពិភពលោកបានផ្ញើសារចូលរួមមរណទុក្ខនេះ។
លោក ហោ ណាំហុង មានប្រសាសន៍បន្ថែមថា ៖ «នេះជាមហាសោកនាដកម្មរបស់ជាតិយើង ធ្វើឲ្យមានការរន្ធត់យ៉ាងសម្បើម ចំពោះប្រជាជន ប្រជាពលរដ្ឋយើងនៅទូទាំងប្រទេសទាំងអស់។ ហេតុដូច្នេះហើយ ក្នុងនាមរាជរដ្ឋាភិបាល ជាថៃ្ងដែលយើងកាន់ទុក្ខ មរណទុក្ខ ចំពោះអ្នករងគ្រោះនៃឧបទ្ទវហេតុនេះ ក្នុងនាមរាជរដ្ឋាភិបាល បានអញ្ជើញអង្គទូត ជាមួយថ្នាក់ដឹកនាំយើងខ្លះដើម្បីរៀបចំគោរពវិញ្ញាណក្ខន្ធ»។
ព្រះសង្ឃចំនួន ៤៩អង្គ ដឹកនាំដោយសម្ដេចសង្ឃ ទេព វង្ស បានសូត្រធម៌បង្សុកូល និងនមស្សការជូនពរជ័យដល់ព្រលឹងអ្នកស្លាប់នៅក្នុងសោកនាដកម្មកន្លងមកនេះ។
អនុប្រធានទី១ នៃគណៈកម្មាធិការអចិន្ត្រៃយ៍រៀបចំបុណ្យជាតិ និងអន្តរជាតិ នៅក្នុងប្រទេសកម្ពុជា លោក ជា កៀន បានអានវិយោគកថានៅក្នុងពិធីបង្សុកូលនោះថា ទុក្ខសោកនេះគឺធ្ងន់ធ្ងរលើសការស្មាន ៖ «ការបាត់បង់ជីវិតរបស់បងប្អូនជនរួមជាតិយើងជាច្រើននាក់ក្នុងរយៈពេលដ៏ខ្លីនៅកន្លែងតែមួយដែលមិនធ្លាប់មានទាល់តែសោះក្នុងប្រវត្តិនៃការរៀបចំបុណ្យជាតិ និងអន្តរជាតិនៅកម្ពុជា តាំងពីអំទ្បុងកាលដ៏យូរលង់កន្លងមក គឺជាការមរណៈមួយដ៏គួរឲ្យសោកសង្រេង និងស្តាយស្រណោះបំផុត»។
នៅព្រឹកថៃ្ងទី២៥ ខែវិច្ឆិកានេះដែរ ទង់ជាតិកម្ពុជា នៅវិមានឯករាជ្យ និងទង់ជាតិនានានៅតាមដងផ្លូវ និងនៅក្នុងសាលារៀន ត្រូវបានគេបង្ហូតមកពាក់កណ្តាលដង ដើម្បីកាន់ទុក្ខនៅទូទាំងប្រទេសកម្ពុជា។
សេចក្ដីប្រកាសជាផ្លូវការចេញដោយក្រសួងសង្គមកិច្ច អតីតយុទ្ធជន និងយុវនីតិសម្បទា ចុះថៃ្ងទី២៥ ខែវិច្ឆិកា បានបញ្ជាក់ថា ចំនួនអ្នកស្លាប់ដោយសារឧបទ្ទវហេតុនៅលើស្ពានកោះពេជ្រកន្លងមកនេះ គឺចំនួន ៣៤៧នាក់ និងអ្នករងរបួសចំនួន ៣៩៥នាក់ កំពុងសម្រាកព្យាបាលនៅក្នុងមន្ទីរពេទ្យនានា។
រដ្ឋាភិបាលកម្ពុជា គ្រោងនឹងសាងសង់ស្តូបមួយដើម្បីរំឭកវិញ្ញាណក្ខន្ធដល់អ្នកស្លាប់ទាំងនោះនៅក្បែរស្ពានកោះពេជ្រនោះ៕
No comments:
Post a Comment