ប្រធាននាយកដ្ឋានកណ្ដាលនគរបាលយុត្តិធម៌នៃអគ្គស្នងការដ្ឋាននគរបាលជាតិ នាយឧត្តមសេនីយ៍ផ្កាយមាស៣ លោក ម៉ក់ ជីតូ មានប្រសាសន៍នៅព្រឹកថ្ងៃពុធ ទី២៤ ខែវិច្ឆិកាថា ចាប់ពីមន្ទីរពេទ្យទទួលជនរងគ្រោះថ្នាក់នៅកោះពេជ្រមកសម្រាក ថ្នាំពេទ្យមិនទាន់ខ្វះទេ ព្រោះមានការជួយឧបត្ថម្ភពីកាកបាទក្រហមជាតិ និងអន្តរជាតិ។
លោកបន្តថា កាលពីយប់ថ្ងៃទី២៣ ខែវិច្ឆិកា មានជនរងគ្រោះជាកុមារីម្នាក់បានស្លាប់ ដោយសាររបួសធ្ងន់ពេក ៖ «អ្នករបួសដែលយើងទទួលមកមាន ១៨១នាក់ ហើយអ្នកស្លាប់ គឺសាកសពដែលយើងគ្រប់គ្រង និងប្រគល់ជូនទៅធ្វើបុណ្យធ្វើទាននៅស្រុក សរុបទាំងអស់អ្នកស្លាប់មាន ១៤២នាក់។ សពយកអស់នៅសល់តែ៣»។
ស្ថានភាពអ្នកជំងឺគ្រោះថ្នាក់ពីតំបន់កោះពេជ្រក្នុងមន្ទីរពេទ្យព្រះកេតុមាលា និងមន្ទីរពេទ្យព្រះកុសុមៈ អ្នកជំងឺមានគ្រែសម្រាក បើទោះបីគ្រែខ្លះអ្នកជំងឺសម្រាក ២នាក់ក៏ដោយ។ នៅមន្ទីរពេទ្យកាល់ម៉ែត មានអ្នកជំងឺមកពីកោះពេជ្រមិនទាន់មានគ្រែសម្រាកគ្រប់ទេ។ គ្រូពេទ្យបានឲ្យដឹងថា ដោយសារមន្ទីរពេទ្យនោះមានអ្នកជំងឺច្រើនលើសលុបពេក។
ការព្យាបាលជំងឺនៅមន្ទីរពេទ្យព្រះកេតុមាលា ត្រូវដឹកតាមរថយន្តពីអគារមួយទៅអគារមួយដោយគ្រូពេទ្យ ដើម្បីថតឆ្លុះជើងដែលជាំ និងហើម។
វេជ្ជបណ្ឌិត ព្រំ សង់ហួន នៃមន្ទីរពេទ្យព្រះកេតុមាលា ហៅពេទ្យធំ មានប្រសាសន៍ថា អ្នករបួសកំពុងសង្គ្រោះបន្ទាន់មាន ៩នាក់ ស្រី ៧នាក់ ប្រុស ២នាក់។ លោកបន្តថា អ្នកជំងឺក្រំខ្លាំង និងសន្លប់ នៅពេលព្យាបាលបានធូរបន្តិច ពួកគេនៅពេលទទួលទានអាហារបានក្អួត ព្រោះមុនពេលកើតហេតុជាន់គ្នាលើស្ពានពេជ្រនោះ មិនទាន់ទទួលទានអាហារ និងក្រំក្នុង ដែលគ្រូពេទ្យចាំបាច់ត្រូវថតឆ្លុះ។
វេជ្ជបណ្ឌិត ព្រំ សង់ហួន បានបន្ថែមថា ៖ «ចំពោះឱសថ បើតាមខ្ញុំក្តាប់ទៅមិនទាន់មកដល់ទេ មានតែក្រុមហ៊ុន។ រឿងគ្រប់គ្រាន់វាមិនគ្រប់គ្រាន់ទេ គ្រាន់ថា យើងចេះតែដោះស្រាយទៅតាមលទ្ធភាពដែលយើងមាន សំខាន់គឺសេរ៉ូម ថ្នាំបំបាត់ការឈឺចាប់ ថ្នាំផ្សះអីហ្នឹង ហើយនិងថ្នាំដូចជាលាងរបួសអីហ្នឹង»។
វេជ្ជបណ្ឌិតផ្នែករបួសគ្រាំគ្រា និងជំងឺឆ្អឹង នៃមន្ទីរពេទ្យព្រះកុសុមៈ ហៅពេទ្យលោកសង្ឃ លោក ដួង ប៊ុណ្ណ មានប្រសាសន៍ថា នៅព្រឹកថ្ងៃពុធ ទី២៤ ខែវិច្ឆិកា មានអ្នកជំងឺប្រុសម្នាក់បានស្លាប់ ព្រោះពេទ្យគ្មានកន្លែងលាងឈាមប្ដូរឲ្យអ្នកជំងឺក្រំក្នុងខ្លាំងបានឡើយ។
លោកវេជ្ជបណ្ឌិតបន្តថា របួសដោយសារការជាន់សង្កត់ធ្វើឲ្យជើងហើម សង្កត់ទៅលើសរសៃឈាម និងសរសៃប្រសាទ ដូច្នេះគ្រូពេទ្យចាំបាច់ត្រូវព្យាបាលដោយវះកន្លែងជាំបង្ហូរឈាមចេញ។ លោកថា នៅថ្ងៃពុធដដែល លោកទើបបញ្ជូនអ្នកជំងឺក្រំក្នុងខ្លាំងចំនួន ៥នាក់ ដែលមិនអាចបត់ជើងតូច ត្រូវបញ្ជូនទៅបន្ទប់សង្គ្រោះបន្ទាន់ ព្រោះអាការៈបែបនេះបើមិនអាចបត់ជើងតូច អាចមានគ្រោះថ្នាក់ដល់ជីវិត។
លោកបន្តថា ៖ «ការសង្កត់ខ្លាំងធ្វើឲ្យសាច់ដុំនៅកន្លែងជើងហ្នឹងវាបែក ពេលដែលបែកទៅវាបញ្ចេញនូវជាតិពុលម្យ៉ាង ដែលចេញពីសាច់ដុំទៅ គេហៅម៉ីញ៉ូគ្លូប៊ីន ដែលវាចូលទៅក្នុងឈាមទៅស្ទះនៅតម្រងនោម ពេលហ្នឹងធ្វើឲ្យអ្នកជំងឺអត់នោម អ្នកជំងឺអាចមានគ្រោះថ្នាក់ដល់ស្លាប់ បើសិនជាយើងមិនជួយ»។
នាយកមន្ទីរពេទ្យព្រះកុសុមៈ លោកសាស្ត្រាចារ្យវេជ្ជបណ្ឌិត តេង សឿន មានប្រសាសន៍ថា ថ្នាំពេទ្យដែលប្រើច្រើនក្នុងការជួយសង្គ្រោះអ្នកជំងឺ គឺសេរ៉ូម និងក្រោយការវះកាត់ គឺប្រើថ្នាំផ្សះចាក់តែម្ដង។
លោកថា ថ្នាំព្យាបាល ពេលក្នុងមន្ទីរពេទ្យប្រើអស់ មានអង្គការពេទ្យអន្តរជាតិ និងជាតិ ជួយឧបត្ថម្ភច្រើន ហើយកាលពីល្ងាចថ្ងៃ២៣ ខែវិច្ឆិកា ស្ថានីយទូរទស្សន៍ស៊ី.ធី.អិន បានជួយឧបត្ថម្ភថ្នាំច្រើន។ ប៉ុន្តែលោកមិនទាន់បានគិតពីចំនួនប្រើប្រាស់ថ្នាំរួចនោះនៅឡើយទេ។
លោកបន្តថា ៖ «កៀបកិន រួចដល់អ្នកស្លាប់ហើយ ស្ទាបមើលផ្ទាល់ មិនមែនចេះតែស្លាប់ហើយអត់មើលទេ មុននឹងថា គាត់ស្លាប់មែនទែនហើយ។ យើងមើលនៅនេះ មើលនៅត្រង់ហ្នឹងតែម្តង គឺយើងស្ទាបមើលព្រួកអស់ហើយឆ្អឹងជំនីរ ពោះអីហ្នឹង រួចអ្នករស់នៅច្រើនតែបែកបាក់។ ប៉ុន្តែឥឡូវយើងបារម្ភដែរ វាខ្ទាំពោះខ្ទាំទ្រូង ឬក៏ត្រូវវាមិនចំកន្លែងក្នុងពោះហ្នឹង យើងត្រូវតាមដានខ្លាំង មិនដឹងវះនៅត្រង់ណា ទុកត្រង់ណា ព្រោះវាខ្ទាំ វាខុសពីបែក»។
ក្រុមជនរងគ្រោះដែលនៅរស់រានមានជីវិតកំពុងព្យាបាលនៅមន្ទីរពេទ្យរដ្ឋទាំងអស់នោះ បានឲ្យដឹងថា គ្រូពេទ្យបានយកចិត្តទុកដាក់ព្យាបាល និងសាកសួរសុខភាពក្នុងប្រមាណ ២ម៉ោងម្តង។ ចំណែកអាហារទទួលទានមានអង្គការជាច្រើន ស្ថាប័នគ្រឹះសាសនា និងអាហារដ្ឋាននានា បានយកមកឲ្យពួកគេហូប ៣ពេលក្នុង១ថ្ងៃ។
ក្រុមអ្នកជំងឺបានថ្លែងអំណរគុណចំពោះមន្រ្តីសមត្ថកិច្ច និងគ្រូពេទ្យដែលបានជួយសង្រ្គោះពួកគេថា ៖ «ខ្ញុំសូមអរគុណលោកគ្រូពេទ្យ និងកាកបាទក្រហម ដែលបានជួយសង្រ្គោះយកខ្ញុំ និងទាំងអស់គ្នាឲ្យបានជាផុតពីគ្រោះថ្នាក់ ដែលកើតនៅលើស្ពានកោះពេជ្រហ្នឹង»។
កីឡាករទូកនាគខៀវមានជ័យ មកពីខេត្តកណ្តាល ឈ្មោះ សៀង វុទ្ធិ បន្ថែម ៖ «ដល់ពេលប៉ូលិសគេបាញ់ទឹករួច កាកបាទក្រហមគេបោះទឹកបោះអីឲ្យហ្នឹង អាចមានកម្លាំងបានធូរដកដង្ហើម វាអត់សូវក្តៅ បើអត់ទឹកវិញ មនុស្សទាំងអស់ហ្នឹង យ៉ាងច្រើនបានតែ ១ម៉ោងកន្លះត្រូវស្លាប់អស់»។
យុវតីមកពីឃុំត្នោត ស្រុកពារាំង ខេត្តព្រៃវែង ឈ្មោះ ស៊ូ សាវិត អាយុ ១៧ឆ្នាំ ថ្លែងថា ៖ «ខ្ញុំសូមអរគុណលោកគ្រូពេទ្យដែលជួយខ្ញុំស្ទុះស្ទារ ដើម្បីជីវិតរបស់ខ្ញុំ ហើយខ្ញុំសូមអរគុណកាកបាទក្រហម ដែលជួយដល់រូបខ្ញុំ ជួយឧបត្ថម្ភជាលុយ និងជារបស់របរទាំងអស់សម្រាប់ពួកខ្ញុំព្យាបាល។ ទាហានអូប័រគាត់មកជួយខ្ញុំ ខ្ញុំសូមអរគុណដល់អ្នកបើកអូប័រដែលបានបើកមកជួយខ្ញុំ មកដល់ត្រើយខាងម្ខាង ខ្ញុំសូមអរគុណច្រើន សូមឲ្យគាត់មានអាយុវែង»។
តំណាងអង្គការសាយបាយសាយ របស់ប្រទេសជប៉ុន លោក ឯក គុនហឿន បានឲ្យដឹងថា បានជួយយកអាហារ ២ពេល ថ្ងៃត្រង់ និងល្ងាចដល់មន្ទីរពេទ្យរដ្ឋ ដែលបានទទួលជនរងគ្រោះថ្នាក់កោះពេជ្រក្នុង ១ពេលចំនួន ១ពាន់កញ្ចប់ មានបាយ សម្ល ទឹកសុទ្ធ ហើយការផ្តល់អាហារនោះមានតាំងពីថ្ងៃ២៣ វិច្ឆិកាមក។
រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា ជាអនុប្រធានគណៈកម្មការដោះស្រាយការងារបន្ទាន់ឧបទ្ទវហេតុនៅកោះពេជ្រ មានប្រសាសន៍នៅរសៀលម៉ោង ៥ និង ៣០នាទី ថ្ងៃពុធ ទី២៤ ខែវិច្ឆិកាថា ចំនួនអ្នកស្លាប់មាន ៤៥៦នាក់ អ្នករបួសមាន ៣៩៥នាក់ទេ៕
No comments:
Post a Comment